Meta e Beqaj pas kafazit të xhamtë, Komiteti i Helsinkit: Praktika në kundërshtim me GJEDNJ

Komiteti Shqiptar i Helsinkit ka shprehur shqetësim për praktikën e vendosjes së të pandehurve në kafaze të mbyllura me xham gjatë zhvillimit të seancave gjyqësore, duke marrë si shembull rastet e Ilir Metës dhe Ilir Beqajt.

Sipas KSHH-së, një masë e tillë nuk përputhet me kriteret e përcaktuara nga Gjykata Evropiane e të Drejtave të Njeriut, kur nuk mbështetet në arsye konkrete, që lidhen me sigurinë.

Nga monitorimi i kryer nga KShH rezulton se si Ilir Beqaj ashtu edhe Ilir Meta kanë qëndruar gjatë seancave në hapësira të izoluara me xham, çka mund të ketë vështirësuar komunikimin e tyre me mbrojtësit ligjorë.

Në lidhje me Erion Veliajn, KShH ka evidentuar se në procese të tjera ai ka qenë i ulur pranë avokatëve të tij, ndërsa në seancat e zhvilluara në Gjykata e Posaçme Kundër Korrupsionit dhe Krimit të Organizuar është mbajtur në një strukturë të ndarë me xham.

Komiteti thekson se përdorimi i këtyre masave kufizuese duhet të justifikohet nga rrethana specifike, si rreziku i largimit nga drejtësia, mundësia e sjelljeve të dhunshme ose kërcënimi për mbarëvajtjen e seancës, dhe jo të zbatohet automatikisht vetëm sepse i pandehuri ndodhet në paraburgim.