BRUKSEL – BE kërkon masa të reja për të frenuar deficitin tregtar me Kinën

BRUKSEL, 16 tetor /ATSH-DPA/ – Udhëheqësit e Bashkimit Evropian kanë kërkuar instrumente të reja për të trajtuar çekuilibrat tregtarë të bllokut, pasi deficiti tregtar është rritur në rreth 1 miliard euro në ditë.

Në një deklaratë të përbashkët të miratuar gjatë samitit në Bruksel, liderët e BE-së i kërkuan Komisionit Evropian të forcojë urgjentisht mekanizmat ekzistues me instrumente të reja për të përballuar më mirë këto çekuilibra.

Ata gjithashtu nxitën vazhdimin e dialogut me partnerët tregtarë, me synimin për të arritur rezultate konkrete.

Edhe pse deklarata nuk e përmend Kinën në mënyrë të drejtpërdrejtë, Pekini mbetet në qendër të shqetësimeve të BE-së për marrëdhëniet tregtare.

Deri më tani, Brukseli është mbështetur kryesisht te diplomacia dhe dialogu për të rivendosur ekuilibrin tregtar me Kinën, në vend që të përdorë tarifa doganore dhe kufizime të tjera.

Përpara samitit, kancelari gjerman Friedrich Merz dhe presidenti francez Emmanuel Macron kërkuan së bashku dy masa të reja evropiane për të frenuar praktikat që, sipas tyre, shtrembërojnë konkurrencën dhe dobësojnë kompanitë evropiane, duke rritur njëkohësisht varësinë ekonomike të bllokut.

Masa e parë synon diversifikimin e furnizimit, në mënyrë që kompanitë evropiane të mos varen tepër nga furnizuesit e një vendi të vetëm. Masa e dytë parashikon krijimin e një procedure të përshpejtuar që do të mundësonte përjashtimin e një vendi tjetër nga tregu i vetëm evropian.

Javën e kaluar, komisioneri i BE-së për Tregtinë, Maros Sefcovic, njoftoi plane për të kufizuar importet e automjeteve hibride në bllok.

Prodhuesit evropianë të makinave po përballen me presion të madh nga eksportet masive të automjeteve kineze me çmime të përballueshme, të cilat po konkurrojnë me modelet evropiane si në tregun e BE-së, ashtu edhe në atë kinez. /Ad.Ab./ a.jor.