Mickoski: Nuk jam i kënaqur me mesazhet e von der Leyen — “Ndryshimi i Kushtetutës qëndron në tryezë”

Kryeministri Hristijan Mickoski deklaroi sot se pret që bisedimet me Bullgarinë të nisin javën e ardhshme, pasi Ministria e Punëve të Jashtme dhe Tregtisë së Jashtme ka dorëzuar kërkesën zyrtare për takim bilateral, siç raporton portali Сакам да кажам.

Mickoski e vlerësoi takimin e djeshëm me presidenten e Komisionit Europian, Ursula von der Leyen, si “jashtëzakonisht miqësor, të dobishëm dhe përmbajtësor”, duke theksuar se ai mund të jetë kyç për proceset në të ardhmen.

“Nuk mund të them se jam i kënaqur me mesazhet që dërgoi presidentja. Ajo tha qartë se ndryshimi i Kushtetutës qëndron në tryezë — punë e pranuar nga qeveria e mëparshme”, deklaroi Mickoski, duke iu përgjigjur pyetjeve të gazetarëve pas inspektimit të punimeve në urën e rrugës “Ljubljanska” në komunën Karposh të Shkupit, shkruan i njëjti portal.

Ai shtoi se bisedimet që më parë ishin të pamundura tashmë janë në zhvillim e sipër dhe se me durim e kohë do të arrihen rezultate që paraardhësit nuk mund t’i imagjinonin. Si inkurajim, ai përmendi vlerësimet pozitive për angazhimin e qeverisë dhe zbatimin e reformave, të cilat janë vlerësuar si më të mirat në rajon.

Sipas Mickoskit, integrimi gradual paraqet shans për vendin dhe motiv shtesë për vijimin e procesit reformues. Kryeministri paralajmëroi gjithashtu dy udhëtime në Bruksel në nëntor: fillimisht takim me komisioneren e zgjerimit dhe politikës së fqinjësisë së mirë, e më pas samitin rajonal mes BE-së dhe Ballkanit Perëndimor. Ndërkohë, sipas portalit 4NEWS, procesi për zgjidhjen e kontestit ka nisur dhe ministri i Jashtëm Mucunski shkon në Sofje të martën.