Mickoski takim me Erdogan në Stamboll, detaje nga bisedimet

Kryeministri i Maqedonisë së Veriut, Hristjan Mickoski u takua këtë të shtunë në Stamboll me presidentin e Turqisë, Rexhep Tajip Erdogan.

Në një njoftim nga qeveria e Maqedonisë së Veriut, u njoftua se në takim u konfirmua bashkëpunimi i ngushtë, miqësor dhe strategjik midis dy vendeve.

Udhëheqësit e të dy vendeve shqyrtuan mundësitë e thellimit të mëtejshëm të bashkëpunimit ekonomik, rritjes së tregtisë, investimeve të reja, si dhe nxitjes së bashkëpunimit në sektorët e infrastrukturës, energjisë, turizmit, arsimit dhe mbrojtjes.

Mickoski, sipas njoftimit, theksoi rëndësinë e Turqisë si një partner i rëndësishëm ekonomik dhe politik, duke vënë në dukje se qeveria e tij mbetet e përkushtuar për krijimin e një klime biznesi të favorshme dhe të parashikueshme për investimet e reja turke dhe krijimin e vendeve të reja të punës.

“Presidenti Erdogan konfirmoi mbështetjen e Turqisë për zhvillimin dhe prosperitetin e vendit tonë, si dhe gatishmërinë për të forcuar më tej marrëdhëniet dypalëshe në të gjitha fushat me interes të ndërsjellë”, shtoi qeveria e Maqedonisë së Veriut në një deklaratë.

Kryeministri i Maqedonisë së Veriut ndodhet që nga dje në Stamboll, ku mori pjesë në një forum biznesi kushtuar promovimit të bashkëpunimit ekonomik midis Maqedonisë së Veriut dhe Turqisë.

Në fjalimin e tij në forum, Mickoski përmendi se ka një interes në rritje nga bizneset turke për investime në Maqedoninë e Veriut dhe i ftoi kompanitë turke të marrin pjesë në historinë e rritjes së vendit të tij.