Migrojnë minoritetet

Shumë romë, egjiptianë dhe ashkalinj të Kosovës kanë marrë rrugën e kurbetit për të gjetur një jetë më të mirë në vendet e Bashkimit Evropian.

Rastet e shpeshta të migrimit të minoriteteve janë pohuar edhe nga zyrtarët e Policisë së Kosovës, të cilët së fundi kanë shtuar masat përgjatë kufijve për të zbuluar dhe kapur kontrabanduesit e migrantëve.

Migrimi i pjesëtarëve të minoriteteve, kryesisht të komuniteteve: romë, egjiptianë dhe ashkalinj, ka pasur rritje të theksuar kohëve të fundit. Kështu kanë deklaruar zyrtarët e Policisë së Kosovës.

Për këtë arsye, Policia Kufitare është mobilizuar dhe ka ngritur vigjilencën për parandalimin dhe luftimin e kësaj dukurie si dhe zbulimin dhe arrestimin e të dyshuarve potencialë për kontrabandimin e tyre.

Një ashkali i Kosovës ka thënë për gazetën Tribuna, se jeta në shtetin e Kosovës për komunitetin e tij është bërë shumë e rëndë dhe ata po mundohen me çdo kusht ta lëshojnë Kosovën.