MILLATOVIQ KTHEN LIGJIN PËR PAGAT NË DREJTËSI: DREJTËSIA DUHET TË VLEJË PËR TË GJITHË

_{Foto: predsjednik.me}

Presidenti i Malit të Zi, Jakov Millatoviq, ka kthyer në Kuvend për rishqyrtim Ligjin për pagat dhe të drejtat e tjera të lidhura me ushtrimin e funksioneve gjyqësore dhe kushtetuese.

Nga Kabineti i Presidentit theksuan se gjyqtarët dhe prokurorët duhet të paguhen në mënyrë adekuate për përgjegjësinë dhe kompleksitetin e punës së tyre, por vlerësuan se zgjidhjet e miratuara ngrenë çështje serioze të drejtësisë dhe barazisë.

Sipas Millatoviqit, rritja e pagave duhet të jetë më e orientuar drejt gjyqtarëve dhe prokurorëve me paga më të ulëta dhe ngarkesë më të madhe, ndërsa ligji aktual parashikon rritjen më të madhe në vlerë nominale për drejtuesit e funksioneve më të larta në sistemin e drejtësisë.

Kabineti i Presidentit ka ngritur gjithashtu çështjen e trajtimit të punonjësve të tjerë të sektorit publik, duke theksuar se edhe pagat e tyre financohen nga i njëjti buxhet shtetëror.

Në arsyetimin për kthimin e ligjit, përmenden edhe vërejtjet e Ministrisë së Financave lidhur me kostot shtesë, parimin e barazisë dhe nevojën për harmonizim të mëtejshëm të dispozitave.

Millatoviq theksoi se një drejtësi e pavarur dhe e paguar mirë është e domosdoshme, por ajo duhet të shoqërohet me profesionalizëm, përgjegjësi, efikasitet dhe besimin e qytetarëve në institucionet.

Sipas tij, Mali i Zi ka nevojë për një sistem drejtësie të fuqishëm, por edhe për një shtet të drejtë, ku kriteret për shpenzimin e parave publike janë të qarta dhe të barabarta për të gjithë.