Ministri i përkohshëm iranian i Mbrojtjes: SHBA-ja po fsheh problemet që i ka shkaktuar lufta

Ministri i përkohshëm iranian i Mbrojtjes, Majid ibn Reza, ka akuzuar administratën Trump se po përpiqet të fshehë problemet që lufta i ka shkaktuar vetë Uashingtonit, siç njofton Al Jazeera në liveblog-un e saj për luftën.

Në një postim në X, i shpërndarë edhe nga transmetuesi shtetëror IRIB, Reza shkroi se pretendimet amerikane për shkatërrimin e kapaciteteve ushtarake të Iranit “nuk ndryshojnë asgjë”. “Mos e fshehni konfuzionin në Shtëpinë e Bardhë me lojëra lufte imagjinare; presioni i opinionit publik, lodhja e trupave dhe kostot në rritje të luftës i kanë hedhur llogaritë tuaja në kaos”, shkroi ai në farsi.

“Do ta shihni kapacitetin dhe iniciativën e Iranit në terren, dhe do ta shijoni ndikimin e tij politik”, shtoi ai, në një paralajmërim të hapur ndaj Uashingtonit. Deklarata vjen pas një vale deklaratash të Trump-it që pretendoi se marina, forcat ajrore dhe mbrojtja ajrore e Iranit janë “zhdukur” dhe se SHBA-ja ka “kontroll pothuajse total” të Ngushticës së Hormuzit.

Retorika e të dyja palëve është ashpërsuar ndjeshëm në ditët e fundit, ndërkohë që bisedimet indirekte për ri-hapjen e ngushticës kanë ngecur dhe SHBA-ja po përforcon praninë detare në rajon.