Ministria Drejtësisë çel dyert për publikun në ditën Kombëtare të drejtësisë

Në kuadër të ditës Kombëtare të Drejtësisë ditën e dielë , 10 Maj, nga ora 11.30 – 13.30, Ministria e Drejtësisë hap dyert  për publikun dhe të interesuarit në Ekspozitën Retrospektivë “Drejtësia Ndër Vite në Shtetin Shqiptar” .

Kjo iniciativë njofton Ministria e Drejtësisë, organizohet në bashkëpunim me Bibliotekën Kombëtare dhe synon të evidentojë dhe promovojë ekzistencën e normave ligjore dhe rregullatore nëpërmjet të cilave ka funksionuar sistemi i drejtësisë dhe organizimi i pushtetit ekzekutiv në Shqipëri.

Pjesë e kësaj ekpozite që zhvillohet në hollin qendror të Ministrisë së Drejtësisë, përveç rikonceptimit të këndit historik të këtij institucioni, do të jetë edhe fondi i botimeve autentike të akteve ligjore që datojnë prej më shumë se 1 shekulli, që nga dita e parë kur qeveria e Ismail Qemalit miratoi dekretin e titulluar “Kanuni i Zhurisë”, mbi të cilin do të niste nga funksionimi gjyqësori shqiptar. Nëpërmjet këtij aktiviteti Ministria e Drejtësisë gjen rastin që të shpreh nderim dhe respekt ndaj elitës së jurisprudencës shqiptare.