Misioni iranian në OKB hedh poshtë si “të pabazuara” raportet për dëbimin e delegacionit nga SHBA-ja

Misioni i Iranit në Kombet e Bashkuara ka hedhur poshtë si “të pabazuara” raportet se diplomatët e tij u dëbuan nga Shtetet e Bashkuara pas dështimit të bisedimeve bërthamore, sipas përditësimit të fundit të transmetuar nga Al Jazeera. Sipas misionit iranian, delegacioni u largua nga Nju Jorku të hënën sipas planit — dhe jo me urdhër të Uashingtonit.

Reagimi erdhi pak orë pasi portali amerikan Axios raportoi se sekretari amerikan i Shtetit, Marco Rubio, u kishte kërkuar iranianëve të linin SHBA-të deri të mërkurën në mbrëmje, pasi negociatat bërthamore u shembën të martën. Në një postim në rrjetin X, misioni iranian shkroi: “Duke mos arritur asgjë, Departamenti i Shtetit dhe ky medium tani i janë drejtuar fabrikimeve dhe gënjeshtrave.”

Urdhri i raportuar për largimin e delegacionit iranian para afatit erdhi pas ngecjes së bisedimeve indirekte mes Uashingtonit dhe Teheranit, të ndërmjetësuara nga Katari në margjinat e Asamblesë së Përgjithshme të OKB-së. Bisedimet, të cilat synonin ndërtimin e besimit për t’i hapur rrugën ri-hapjes së Ngushticës së Hormuzit, u shembën pa marrëveshje.

Teherani dhe Uashingtoni kanë zhvilluar tashmë shtatë muaj lufte, ndërsa përpjekjet diplomatike vazhdojnë në disa fronte. Irani ka kërkuar heqjen e bllokadës detare amerikane dhe të sanksioneve si kusht për ri-hapjen e Hormuzit, ndërsa SHBA-ja kërkon një marrëveshje që të zgjidhë njëherësh të gjitha çështjet e hapura, përfshirë programin bërthamor të Iranit.