Mitsotakis për Wall Street Journal: synojmë rritje sa dyfishi i eurozonës, kriza e kostos së jetesës shqetësimi numër një

Kryeministri grek Kyriakos Mitsotakis, në një intervistë për The Wall Street Journal, siç përcjell zyra e kryeministrit grek, ka paraqitur një “kontratë të re” me votuesit para zgjedhjeve të përgjithshme të vitit 2027: rritje ekonomike me një ritëm të paktën dy herë më të lartë se pjesa tjetër e eurozonës, e nxitur nga investimet, për të ulur më tej papunësinë dhe për të rritur pagat dhe të ardhurat e disponueshme. Intervista, e realizuar nga gazetari Gordon Fairclough, përqendrohet te transformimi i Greqisë që nga kriza e borxhit.

Mitsotakis kujtoi se Greqia humbi rreth një të katërtën e prodhimit të saj të brendshëm bruto gjatë dekadës së krizës. Qeveria e tij mori detyrën në vitin 2019, dhe sipas tij borxhi po bie me ritmin më të shpejtë mes vendeve të OECD-së, ndërsa Greqia sot merr hua me një normë më të ulët se katër nga shtatë vendet e G7-ës.

Megjithatë, kryeministri pranoi se pagat mbeten relativisht të ulëta, edhe pse janë dukshëm më të larta se shtatë vjet më parë, dhe se suksesi makroekonomik nuk është përkthyer ende plotësisht në jetën e përditshme. “A kemi arritur deri aty? Përgjigja e ndershme është jo”, tha ai. Kriza e kostos së jetesës, theksoi ai, “është shumë reale. Është shqetësimi numër një i grekëve. Nuk ka zgjidhje magjike.”

Sipas tij, Greqia mirëpret më shumë se 35 milionë vizitorë në vit, por investimet nuk shkojnë vetëm në turizëm — ato shtrihen edhe në energjinë e rinovueshme, agroushqim, farmaceutikë, logjistikë, transport detar dhe teknologji.

Për Francën, këshilla e tij ishte që, nëse nevojiten masa shtrëngimi, ato të zbatohen në fillim të mandatit. Sa i përket luftës dhe çmimeve të energjisë, ai tha se ato “nuk do të na nxjerrin nga kursi, por do t’i bëjnë gjërat më të vështira”, duke premtuar se bilanci fiskal do të ruhet.