Mitsotakis: Skulpturat e Partenonit u vodhën — tani është koha për presion ndaj Londrës

Kryeministri grek Kyriakos Mitsotakis ka njoftuar sot se Athina do të intensifikojë presionin ndaj Muzeut Britanik dhe qeverisë britanike për ribashkimin e Skulpturave të Partenonit, duke pranuar hapur se diskutimet e deritanishme nuk kanë dhënë asnjë rezultat. Deklarata, e bërë në konferencën “Dialogët për Athinën” të gazetës Vima, përmbante edhe gjuhën më të ashpër të përdorur ndonjëherë nga kryeministri grek për heqjen e skulpturave: “Ishin pjesë e një monumenti të vetëm, i cili u shpërbë dhe, qartësisht, u vodh”, tha ai, siç raporton ProtoThema.

Mitsotakis e cilësoi Partenonin si simbol botëror jo vetëm të kulturës greke, por të njerëzimit, dhe e lidhi kërkesën për ribashkim me simbolikën e demokracisë — duke vënë në dukje se tempulli rrëfen edhe historinë e demokracisë së parë, “në një epokë kur demokracia vihet në pikëpyetje si nga e djathta, ashtu edhe nga e majta”. Ai hodhi poshtë argumentin se kthimi i skulpturave do t’i hapte rrugën pretendimeve të ngjashme ndaj muzeve të mëdha të botës: “Nuk pohojmë se muzeumet e mëdha duhet të zbrazen”, theksoi ai, duke këmbëngulur se Partenoni është një rast unik.

Kryeministri grek iu referua edhe Aktit të Muzeut Britanik të vitit 1963, duke shpjeguar se legjislacioni britanik kufizon aftësinë e Muzeut për të vendosur vetë për kthimin e skulpturave dhe se “do të nevojitet një përjashtim”. “Do t’i intensifikojmë kërkesat tona, jo vetëm ndaj Muzeut Britanik, por edhe ndaj qeverisë britanike”, tha ai sipas ProtoThema, duke shtuar se Athina është e gatshme ta shoqërojë ribashkimin me një bashkëpunim më të gjerë kulturor — përfshirë rikonstruksionin e Muzeut Arkeologjik Kombëtar, koleksionet e të cilit mund të përdoren në kuadër të shkëmbimeve kulturore me Londrën.

Mitsotakis u shpreh i bindur se “ka ardhur koha”, duke iu referuar mbështetjes së opinionit publik britanik për ribashkimin e skulpturave. Ai e lidhi gjithashtu përpjekjen e re me klimën në marrëdhëniet Londër–Bruksel pas Brexit-it, duke vënë në dukje se Athina po ndjek me interes deklaratat e kryeministrit britanik për një marrëdhënie më të ngushtë mes Britanisë së Madhe dhe Bashkimit Europian.