Moggi, shumë i ashpër me Juventusin: Ka nivel të luajë në “Europa League”, jo për Champions

Pas humbjes në shtëpi të Juventusit ndaj Fiorentinës, që e komplikoi ndjeshëm garën për një vend në Champions League, ish-administratori bardhezi Luciano Moggi foli për “TuttoJuve.com”: “Nuk jam i surprizuar nga kjo humbje. Në shtëpi, Juventusi duhet të ndërtojë lojën, por nuk ka mesfushën e duhur për ta bërë këtë. Nuk është rastësi që rezultatet më të këqija këtë sezon kanë ardhur pikërisht në fushën e vet. Jashtë funksionon pak më mirë, sepse mbrohet në kundërsulm dhe mund të shënojë ndonjë gol”.

I pyetur nëse beson ende te Champions-i apo e sheh Juven të destinuar për “Europa League”, ai u shpreh prerë: “Mendoj se nuk ka dyshime për këtë dhe, në fund të fundit, ky kompeticion është niveli i duhur për lojtarët e Juventusit. Nëse do t’i kishin fituar të dyja ndeshjet, do të shkonin në Champions, por ishin të tretët më shumë për gabimet e rivalëve”.

Më pas ai vlerësoi vetëm Luciano Spalletti: “Është normale që të gjithë të vihen në diskutim kur gjërat nuk shkojnë mirë. I vetmi që po përpiqet të nxjerrë diçka nga kjo skuadër është Spalletti. Kjo është e vetmja gjë që mund të them nga ajo që kam parë”.