Mosbindja civile nis që këtë javë, Basha e Kryemadhi: Refuzojmë taksat e ngritura nga Edi Rama

Në përfundim të mbledhjes së përbashkët me LSI-në, Lulzim Basha dhe Monika Kryemadhi dolën para mediave ku thanë se mosbindja civile është zgjidhja e vetme, pasi nuk shehin alternativë tjetër në rrugë institucionale.

“Në këtë vend nuk ka demokraci! Në këtë vend Qeveria shkel Kushtetutën, ligjin pa i dhënë llogari askujt dhe pa asnjë pasojë. Merr fund dhe kapet reforma në drejtësi! Këtu nuk ka më rregulla loje demokratike. Hapësira e vetme është mosbindja qytetare dhe kjo nis që këtë javë me refuzimin, të çdo takse që ka rritur Edi Rama dhe me të gjitha hapat, format dhe mënyrat e mosbindjes qytetare si forma më e lartë e veprimit politik e qytetar kundër një klike që po zbras Shqipërinë”, tha Basha.

Sipas kreu të PD-së, Edi Rama po sundon në mënyrë ilegjitime dhe pasi vodhi zgjedhjet me banda, vazhdon të qeverisë me bandat dhe një grusht oligarkësh të cilëve, thotë ai, u shet Shqipërinë pjesë-pjesë.

Monika Kryemadhi thotë se refuzimi për të paguar taksat është për të larguar dorën e Edi Ramës nga xhepat e shqiptarëve.