Mucunski pas takimit me Petrova-Çamovën në Sofje: konstruktiv, por pa progres — s’ka garanci kundër bllokimit të ri bullgar

SOFJE – Takimi njëorësh mes ministrit të Punëve të Jashtme të Maqedonisë së Veriut, Timço Mucunski, dhe homologes së tij bullgare, zëvendëskryeministres Velisllava Petrova-Çamova, u zhvillua të enjten në Sofje, në margjinat e konferencës ministrore për Korridorin 8. Në qendër të bisedimeve ishte perspektiva evropiane e Shkupit, siç njofton TV21.

Mucunski e cilësoi takimin konstruktiv, por pranoi se nuk është arritur asnjë përparim konkret dhe se palët kanë mbetur me qëndrime të kundërta. Ai tha se nuk ka garanci që, edhe nëse Maqedonia e Veriut miraton ndryshimet kushtetuese, Bullgaria nuk do ta bllokojë në rrugën drejt anëtarësimit në Bashkimin Evropian.

Shefi i diplomacisë maqedonase theksoi se mosbesimi ndër vite vjen nga kërkesat e njëpasnjëshme bilaterale: sapo mbyllet një kërkesë, hapet një tjetër. Ai tha se çështjet që lidhen me gjuhën, identitetin, historinë dhe kulturën nuk duhet ta rëndojnë rrugën evropiane të vendit, ndërsa theksoi se përparimi i Shkupit është edhe interes strategjik i Bullgarisë.

Nga ana e saj, ministrja bullgare tha se Sofja mbështet perspektivën evropiane të Maqedonisë së Veriut, por kërkon përmbushjen e detyrimeve të marra në vitin 2022, ku përfshihen edhe ndryshimet kushtetuese. Ajo u shpreh se asnjë vend anëtar i BE-së nuk mund t’i japë garanci një vendi kandidat për vazhdimin e procesit, por se Bullgaria ka treguar gatishmëri politike për t’iu përmbajtur detyrimeve të marra.

Në takim u diskutua edhe rasti i Iva Mihajllovës, e gjykuar për një aksident trafiku me pasoja vdekjeprurëse, e cila kërkon trajtim në Bullgari — palët ranë dakord që mjekë nga Sofja të vijnë në vend për të kryer kontrolle. Çështja e eshtrave mortore të Car Samoilit nuk ishte temë e bisedës, konfirmoi ministrja bullgare.