NBA/ Philadelphia kompleton përmbysjen historike, fiton ndeshjen e 7-të dhe eleminon Boston

Philadelphia 76ers realizojnë një ndërmarrje historike dhe rikthehen të fitojnë një seri play-off ndaj Boston Celtics për herë të parë që nga viti 1982. Në TD Garden përfundon 109-100 ndeshja e shtatë, rezultat që kompleton një përmbysje të bujshme nga 1-3 dhe eliminon skuadrën e renditur të dytën në Konferencën e Lindjes. Philadelphia udhëheq për […]

Philadelphia 76ers realizojnë një ndërmarrje historike dhe rikthehen të fitojnë një seri play-off ndaj Boston Celtics për herë të parë që nga viti 1982. Në TD Garden përfundon 109-100 ndeshja e shtatë, rezultat që kompleton një përmbysje të bujshme nga 1-3 dhe eliminon skuadrën e renditur të dytën në Konferencën e Lindjes.

Philadelphia udhëheq për pjesën më të madhe të ndeshjes, duke arritur edhe avantazh +18 dhe duke i rezistuar përpjekjeve të vazhdueshme të vendasve për t’u rikthyer, që në minutat e fundit afrohen deri në -1. Vendimtare është qetësia e miqve në momentet më të nxehta, me një seri pikësh në fund që mbyll përfundimisht llogaritë.

Protagonisti absolut është Tyrese Maxey, autor i një “double-double” me 30 pikë dhe 11 rebound, të shoqëruara me 7 asistime. Lideri i Sixers shpërthen në fund dhe realizon një seri personale 8-0 në dy minutat e fundit, duke vulosur fitoren. Në krah të tij dominon Joel Embiid, që e mbyll me 34 pikë, 12 rebound dhe 6 asistime, duke fituar për herë të parë në karrierë një ndeshje të shtatë dhe duke thyer “mallkimin” ndaj Bostonit në play-off.

Mbrëmje për t’u mbajtur mend edhe për rookien VJ Edgecombe, që luan pa frikë dhe kontribuon me 23 pikë, 6 rebound dhe 4 asistime, duke u bërë debutuesi i parë në histori që realizon të paktën 20 pikë, 5 rebound dhe 5 treshe në një ndeshje të shtatë. Më i tërhequr Paul George, që ndalet në 13 pikë.

Për Boston Celtics nuk mjafton paraqitja e Jaylen Brown, që realizon 33 pikë, 9 rebound dhe 4 asistime. Mungesa e Jayson Tatum, i ndalur nga një problem në gju, ndikon ndjeshëm në lojën e skuadrës. Trajneri Joe Mazzulla ndryshon formacionin titullar, por zgjedhjet nuk japin rezultat dhe Boston mbetet menjëherë pas në rezultat.

Vendimtar rezulton edhe saktësia nga distanca: Celtics e mbyllin me 13/49 nga trepikëshi (26.5%), duke konfirmuar një trend negativ – sa herë që bien nën 30%, humbasin. Kështu ndërpritet edhe një seri historike: për herë të parë, Boston humbet një seri play-off pasi kishte qenë në avantazh 3-1.

Për Philadelphia është një fitore që rishkruan historinë e fundit të klubit dhe rikthen besimin për të synuar titullin.