Ndërkombëtarët thirrje për realizimin e Marrëveshjes së Ohrit

Përfaqësuesit e bashkësisë ndërkombëtare sot në Shkup kanë dhënë vlerësimet e tyre lidhur me Marrëveshjen e Ohrit dhe 13 vjetorin e saj.

Ambasadori amerikan Paul Wohlers dhe ambasadori i OSBE-së, Ralf Breth bënë thirrje për angazhim më të theksuar dhe më dinamik të të gjitha palëve për implementimin e plotë e kësaj marrëveshje paqësore, e cila avancon të drejtat e komunitetit shqiptar.

“Marrëveshja e Ohrit e cila u nënshkrua 13 vite më pas është një kthesë që filloi me një proces të rëndësishëm të integrimit të shoqërisë dhe ndërtimit të shtetit multietnik, modern dhe evropian. Është i nevojshëm angazhim i vazhdueshëm i të gjitha palëve të përfshira për të mbajtur dinamikën e implementimit të saj. Misioni i OSBE vazhdon të inkurajoj qeverinë që të përkushtohet në zbatimin dhe realizimin e Marrëveshjes së Ohrit, ajo që është në letër por edhe frymën e saj”, theksoi ambasadori i OSBE-së.

Një shqetësim mbi vonesat e implementimit të Marrëveshjes së Ohrit ka dhënë ambasadori amerikan në Shkup.

“Edhe pas 13 vitesh nga nënshkrimi i Marrëveshjes së Ohrit kanë ngelur ndasitë mes maqedonasve e shqiptarëve”, deklaroi sot ambasadori amerikan Paul Wohlers.

Ai i bëri thirrje partive politike që të punojnë në tejkalimin e këtyre dallimeve dhe implementimin e Marrëveshjes së Ohrit. Garantues të Marrëveshjes së Ohrit janë NATO, SHBA, OSBE dhe Bashkimi Evropian, që më 13 gusht të 2001 ishin lehtësues dhe garantues në firmosjen e kësaj marrëveshje.