Ndërmjetës kataras mbërrijnë në Teheran në përpjekje të koordinuar me SHBA-në për uljen e tensioneve

Ndërmjetës kataras mbërritën të dielën në Teheran, në kuadër të përpjekjeve të koordinuara me Shtetet e Bashkuara për uljen e tensioneve në rajon, siç njofton Reuters duke cituar burime diplomatike. Misioni diplomatik zhvillohet në një moment kur Uashingtoni dhe Teherani shkëmbejnë kërcënime për rifillimin e luftës.

Prania e delegacionit në kryeqytetin iranian u konfirmua edhe nga vetë Teherani. Një zyrtar i lartë iranian i tha Al Jazeera-s se delegacioni kataras udhëtoi të dielën drejt Teheranit dhe se vizita është pjesë e shkëmbimeve rutinë mes dy vendeve në këtë periudhë tensionesh të rritura.

I njëjti zyrtar, që foli në kushte anonimiteti, tha se pengesa kryesore për një zgjidhje diplomatike nuk është mungesa e ndërmjetësimit, por refuzimi i Shteteve të Bashkuara për të pranuar kërkesat legjitime të Iranit dhe, sipas tij, mosmbajtja e përsëritur e angazhimeve nga Uashingtoni.

Katari ka kërkuar vazhdimisht një zgjidhje paqësore të konfliktit dhe është përpjekur të ripërtërijë ndërmjetësimin mes Iranit dhe Shteteve të Bashkuara. Vizita e së dielës vjen një ditë pasi presidenti amerikan Donald Trump deklaroi se Uashingtoni po shqyrton mundësinë e një sulmi ndaj Iranit që të dielën, duke lënë njëkohësisht të hapur edhe mundësinë e një marrëveshjeje me Teheranin.