Ndryshimet në ligjin për QKR-në lehtësojnë biznesin në raport me administratën tatimore

Komisioni për Ekonominë dhe Financat shqyrtoi të hënën projektligjin “Për Qendrën Kombëtare të Regjistrimit”.

Ndryshimet që pëson ligji “Për Qëndrën Kombëtare të Regjistrimit” do të lehtësojë biznesin në raport me administratën tatimore, u shpreh zëvendësministri i Zhvillimit Ekonomik, Ervin Mete, gjatë prezantimit të këtyre ndryshimeve në Komisionin Parlamentar të Ekonomisë.

Lidhur më këtë, deputeti i PD-së, Florion Mima, kërkoi që të ketë një amendim të posaçëm në lidhje me procedurat e çregjistrimit të biznesit për të përshpejtuar procedurat.

Aktualisht, një biznesi zyrtarisht i duhet 6 muaj kohë për të çrregjistruar aktivitetin, por realisht kjo procedurë zgjat edhe me vite. Synimi i projektligjit është të ofrojë një kuadër ligjor bashkëkohor, të qartë dhe të përditësuar, në përputhje të plotë me direktivat e BE-së për shoqëritë tregtare.

Objektivat që kërkon të arrijë janë zbatimi i legjislacionit të BE-së për shoqëritë tregtare dhe përmbushja e kërkesave të MSA-së, si dhe kërkesave të tjera që burojnë nga zhvillimi ndërkombëtar në këtë fushë. Shqyrtimi i projektligjit do të vijojë sërish në mbledhjen e radhës.