Ndryshimi i rregullores, opozita kohë të barabartë me maxhorancën

Ndryshimi i rregullores së Kuvendit i propozuar nga grupi parlamentar i Partisë Demokratike parashikon që fjala e përfaqësuesve të opozitën në parlament të jetë e barabartë me çdo përfaqësues të mazhorancës.

Amendimi i rregullores, shqyrtimi i së cilës u përfshi të enjten në axhendën e Kuvendit, përcakton dhe të drejtën e replikës së opozitës me çdo ministër apo me vetë Kryeministrin. Propozimi i PD-së për ndryshim të nenit 47 të rregullores parashikon që “kur e merr fjalën kryeministri, ka të drejtë të bëjë komente menjëherë pas tij edhe kryetari i grupit parlamentar më të madh të opozitës, ose një përfaqësues i caktuar prej tij, për të njëjtën kohë sa ajo e kryeministrit”.
Përfshirja e kërkesës së PD-së në punimet e Kuvendit, gjatë seancës së fundit plenare, është një përpjekje nga ana e mazhorancës për të rikthyer opozitën në parlament, i bojkotuar prej saj që nga muaji korrik.
Në seancën e 9 tetorit, Kuvendi përfshiu në kalendarin trejavor të punimeve, edhe kërkesën e demokratëve për rishikim të rregullores së Kuvendit. Kjo kërkesë, ne seancen e fundit plenare, me propozim të kryetarit të grupit parlamentar socialist, Gramoz Ruçi, u përfshi në axhendën e parlamentit për t’u shqyrtuar gjatë ditëve në vazhdim.
Bashkë me këtë kërkesë të opozitës, mazhoranca vendosi të zbatojë dhe vendimet e Gjykatës Kushtetuese lidhur me ngritjen e dy komisioneve hetimore të kërkuara nga Partia Demokratike, ai ‘për hetimin e lëvizjes së punonjësve në administratën publike’, pas ardhjes në pushtet të së majtës, si dhe hetimin e fshirjes së të dhënave nga serveri i Drejtorisë së Përgjithshme të Tatimeve.