Negociatat për anëtarësim në BE, Komisioni i Jashtëm shqyrton ecurinë e Kapitujve 1 dhe 30

Komisioni për Evropën dhe Punët e Jashtme, nën drejtimin e kryetarit Igli Hasani, ka zhvilluar një seancë dëgjimore me zëvendësministrin e Ekonomisë dhe Inovacionit, Enkelejd Musabelliu, për të vlerësuar avancimin e procesit të negociatave për Kapitullin 1 “Lëvizja e lirë e mallrave” dhe Kapitullin 30 “Marrëdhëniet me jashtë”.

Kapitulli 1, standardet dhe rregullat teknike

Negociatat për këtë kapitull, të hapura në fillim të vitit 2025, po përqendrohen në përmbushjen e tri piketave kryesore përmbyllëse. Zëvendësministri Musabelliu theksoi se Shqipëria ka arritur një nivel të avancuar përputhshmërie në lidhje me njohjen reciproke të dispozitave dhe ndryshimet legjislative.

Përafrimi ligjor

Ministria e Ekonomisë dhe Inovacionit po menaxhon përafrimin e 27 akteve që rregullojnë standardet teknike të mallrave, në koordinim të ngushtë me Komisionin Evropian.

Kapacitetet administrative

Një sfidë kyçe mbetet krijimi i zyrës së ndërlidhjes dhe pikës së kontaktit për produktet. Këto struktura, të planifikuara pas vitit 2027, do të kërkojnë investime të mëtejshme në fushën e metrologjisë, standardizimit dhe mbikëqyrjes së tregut.

Kapitulli 30, marrëdhëniet me jashtë

Për sa i përket politikave tregtare dhe marrëdhënieve me vendet e treta, Shqipëria ndodhet në një fazë të avancuar të përgatitjeve. Përmbushja e tri piketave të këtij kapitulli është thelbësore për harmonizimin e plotë me politikën tregtare të Bashkimit Evropian:

Forcimi administrativ

Garantimi se marrëveshjet ndërkombëtare të Shqipërisë pasqyrojnë legjislacionin e BE-së.

Bashkëpunimi tregtar

Koordinimi i vazhdueshëm me Komisionin Evropian për çdo ndryshim në politikat tregtare.

Traktatet dypalëshe

Sigurimi i përputhshmërisë së të gjitha marrëveshjeve tregtare të Shqipërisë me vendet e treta, përpara momentit të anëtarësimit.

Seanca dëgjimore u mbyll me diskutime teknike mes anëtarëve të komisionit dhe përfaqësuesve të ekzekutivit, duke konfirmuar vijimësinë e punës për adresimin e prioriteteve të përcaktuara nga Komisioni Evropian.