Nëna u bë shkak, si u zbulua vendi ku fshihej autori i vrasjes së policit në Maliq

Të tjera detaje janë mësuar lidhur me ngjarjen e rëndë që ndodhi mëngjesin e sotëm, 4 qershor, në Maliq, ku mbeti i vrarë efektivi i forcave “Shqiponja” Enea Mekolli, 34 vjeç, dhe mbeti i plagosur një koleg i tij, Edison Andri, 36 vjeç.

Gazetarja e Klan News Daniela Zisi ka mësuar nga burimet hetimore, se detaji që kishte zbuluar vendodhjen e të shumëkërkuarit V.B lidhej pikërisht me nënën e tij.

Autori i ngjarjes në Maliq, ishte në kërkim prej vitit 2017 dhe rezultonte i dënuar me 10 vite burg për prodhim dhe trafik narkotikësh. Por deri më sot ia kishte dalë më së miri të fshihej.

Sipas burimeve, 43-vjeçari është parë ditën e djeshme në Lozhan. Dhe sot forcat e Policisë kishin organizuar kapjen e tij, pasi kanë marrë informacion që nga fshati ka shkuar në stanin ku kishte bagëtitë dhe rrinte me nënën e tij.

Në këtë operacion kanë qenë të përfshirë 6 efektive të forcave “Shqiponja”, mes tyre Mekolli dhe Andri.

V.B i kishte shpëtuar edhe katër herë ndër vite operacioneve të forcave RENEA.

Sipas autoriteteve, efektivët i kanë bërë thirrje të dorëzohej, por ai ka hapur zjarr ndaj tyre. Nga përplasja me armë humbi jetën efektivi Enea Mekolli, ndërsa mbeti i plagosur efektivi Edison Adri.

Pas shkëmbimit të zjarrit, autori u plagos dhe u arrestua nga forcat e policisë. Ngjarja ka shkaktuar reagime të shumta, ndërsa autoritetet po vijojnë hetimet për zbardhjen e plotë të rrethanave të saj.

Këto janë pamjet me dron që tregojnë vendin ku fshihej i shumëkërkuari.

Në pamje shihet stani i izoluar në një zonë të thellë malore, i cili shërbente si vendstrehim për 43-vjeçarin. Objekti ishte i pajisur edhe me kamera sigurie, çka dyshohet se i mundësonte të shumëkërkuarit të monitoronte lëvizjet përreth dhe t’i shmangej forcave të rendit (Lexo këtu).