Nga biletat për Liqenin e Shkodrës u mblodhën 615 mijë euro, por u shitën 20% më pak – parqet kombëtare ankohen për abuzime

Ndërmarrja publike për menaxhimin e parqeve kombëtare të Malit të Zi ka arkëtuar 615 mijë euro nga shitja e biletave për Liqenin e Shkodrës nga 1 janari deri më 20 shtator të këtij viti, si dhe rreth 56 mijë euro nga shfrytëzimi i sipërfaqeve ujore dhe shitja e lejeve të peshkimit, i kanë thënë Vijesti-t nga kjo ndërmarrje që drejtohet nga Marinela Đuretić. Numri i biletave të shitura është rreth 20% më i ulët krahasuar me të njëjtën periudhë të vitit të kaluar.

Por, siç theksojnë nga ndërmarrja, të ardhurat nuk janë masa e vetme e suksesit të një parku kombëtar – qëllimi duhet të jetë që qarkullimi turistik t’i sjellë më shumë dobi komunitetit lokal dhe parkut, pa e kaluar kufirin e pranueshëm të presionit mbi natyrën. “Mbrojtja e hapësirës mbetet detyra kryesore”, theksojnë ata, duke shtuar se Parku i Liqenit të Shkodrës është një nga hapësirat më komplekse për t’u menaxhuar në Mal të Zi.

Ndër mysafirët e huaj, francezët mbeten prej vitesh më të shumtët në numër, por këtë qershor ishin rreth 20% më pak se në të njëjtin muaj të vitit të kaluar. U vu re edhe rënia e numrit të vizitorëve nga Izraeli, ndërsa numri i mysafirëve nga Britania e Madhe ishte më i madh gjatë korrikut dhe gushtit; polakët dhe çekët ishin gjithashtu më të pranishëm se vitin e kaluar.

“Është e rëndësishme të bëhet dallim i qartë midis numrit të regjistruar dhe atij real të shfrytëzuesve të hapësirës. Në terren kemi situatën ku subjekte të caktuara ekonomike i anashkalojnë pikat e kontrollit-pagesës dhe transportojnë vizitorë që nuk kanë biletë për Parkun Kombëtar”, kanë thënë nga ndërmarrja, duke shtuar se nevojiten pika shtesë kontrolli, kontrolle të koordinuara dhe përfshirje më e madhe e shërbimeve inspektuese. Gjatë sezonit, Inspektimi Turistik kreu 47 kontrolle, në 32 prej të cilave u konstatuan parregullsi.

Problemet më të theksuara gjatë sezonit, sipas ndërmarrjes, ishin mungesa e parkingut adekuat dhe ngarkesa e trafikut në Virpazar, numri i madh i vizitorëve në intervale të shkurtra kohore, si dhe kontrolli i mjeteve lundruese dhe transportuesve turistikë. Probleme shtesë paraqesin ndërtimet pa leje, mbeturinat, skelat e parregulluara dhe forma të ndryshme të shfrytëzimit të paligjshëm të hapësirës.

Sipas Planit të ri të menaxhimit për periudhën 2026–2030, parashikohet përmirësimi i infrastrukturës ekzistuese dhe ndërtimi i infrastrukturës së re shoqëruese, si dhe zhvillimi i përmbajtjeve që mundësojnë shfrytëzim më cilësor dhe më të qëndrueshëm të hapësirës. Gjatë këtij viti, për mirëmbajtje u shpenzuan rreth 75 mijë euro, për punime ndërtimore në ndërtesën administrative rreth 28 mijë euro, për mjete lundruese dhe motorë rreth 12 mijë euro dhe rreth dy mijë euro për pajisje; pjesa tjetër e mjeteve shkon për pagat e punonjësve.