Nga furnizues në partnerë, grupet shqiptare në aleancë me Ndrangheta-n, Cosa Nostra-n e Camorra-n, raporti i Antimafias italiane

Grupet kriminale shqiptare nuk janë më thjesht furnizues droge për mafien italiane, por janë bërë partnerë të barabartë në marrëveshje, operacione të përbashkëta dhe ndarje territori, siç njofton Shqiptarja.com, duke cituar raportin e Komisionit Parlamentar Antimafia të Italisë, të publikuar këtë javë dhe të cituar nga Il Sole 24 Ore. Sipas raportit, ky është një ndryshim i madh në hartën kriminale të Italisë.

Sipas raportit, grupet shqiptare e kanë konsoliduar rolin e tyre si partnerë të Ndrangheta-s, Cosa Nostra-s dhe Camorra-s, jo vetëm në trafikun e drogës, por edhe në trafikun e qenieve njerëzore, zhvatje, pastrim parash dhe kontroll të porteve.

Hetimi “Hydra” në Lombardi është një nga shembujt më domethënës të këtij bashkëpunimi: hetuesit zbuluan një rrjet kompleks klanesh shqiptare që vepronin në Italinë veriore, me lidhje të drejtpërdrejta me organizata kriminale kalabreze dhe kampane. Operacioni çoi në 29 arrestime dhe sekuestrimin e 8.5 tonëve kokainë, si dhe në prova për marrjen e kontrollit të porteve të Livornos dhe Gjenovës.

Raporti paralajmëron se mafiet nuk janë më të kufizuara në territoret e tyre tradicionale; ato po zgjerohen në rajonet e pasura veriore, duke u bërë aktorë ekonomikë që kontrollojnë tenderë, biznese dhe institucione. Grupet shqiptare janë pjesë e këtij zgjerimi dhe e kanë rritur praninë e tyre në të gjithë Italinë.

Antimafia italiane thekson se kërcënimi nuk është vetëm kriminal, por edhe ekonomik dhe institucional, pasi këto organizata kanë ndikuar në proceset e prokurimit publik dhe në konkurrencën në treg.