Ngatërruan shishen e ujit, 3 fëmijë pijnë helm

Tre fëmijë nga Shijaku kanë përfunduar në gjendje të rëndë në spital, pasi pinë në një bidon me helm. Në orët e pasdites së djeshme u dërguan në spitalin “Nënë Tereza” Tiranë për ndihmë mjekësore, të vetëhelmuar, pasi gabimisht kishin konsumuar nga një bidon tretësire pesticidesh duke menduar se ishte ujë, fëmijët L.L., 7 vjeç, I.Ç., 7 vjeç dhe motra e tij 3 vjeçare A.Ç., që të tre banues në fshatin Fllakë të komunës Katund i Ri në Shijak. Vajza 3 vjeçare, vëllai i saj 7 vjeçar dhe kushëriri i tyre 7 vjeçar, ishin duke lozur bashkë, kur të etur për ujë kishin marrë një bidon me lëng transparent, duke e menduar për ujë dhe e kishin pirë njëri pas tjetrit. Ishin prindërit e vogëlushëve ata që kuptuan ngatërresën e rëndë të fëmijëve, duke i dërguar me urgjencë në spital, pasi të miturit nisën të ankohen. Pas ndihmës së dhënë aktualisht tre të miturit ndodhen në gjendje të stabilizuar dhe jashtë rrezikut për jetën.