Nis mes protestave seanca e Kuvendit për Gjykatën Speciale

Kuvendi i Kosovës ka nisur punimet këtë të premte, në seancën që për rend dite ka vetëm një pikë: shqyrtimi i propozim-Amendamentit nr. 24 në Kushtetutën e Republikës së Kosovës, të propozuar nga qeveria, për ngritjen e Gjykatës Speciale.

Seanca është shoqëruar me debate, për shkak të kërkesës së opozitës që nga oborri i Kuvendit të largohen forcat e shumta policore.

Pas kësaj kërkese, kryetari i Kuvendit, Kadri Veseli e kërkoi largimin e tyre, ndërsa jashtë janë mbledhur veteranët e UÇK-së në protestë kundër Gjykatës Speciale.

Faton Klinaku, sekretar i OVL, tha se gjykata po i heq Kosovës edhe atë pak sovranitet që i ka mbetur, ndërsa veteranët u bënë thirrje deputetëve të braktisin seancën.