Nis vjelja e mandarinave në Konispol, fermerët presin më shumë prodhim dhe hapin për herë të parë tregun e Zvicrës

Në Konispol ka nisur sezoni i vjeljes dhe eksportit të mandarinave, siç njofton Shqiptarja.com. Zona njihet për këtë kulturë, me rreth 1.000 hektarë të mbjella me mandarina, ndërsa rreth 850 fermerë merren me këtë prodhim dhe kanë nxjerrë në treg prodhimin e këtij viti.

Pritshmëritë e fermerëve janë pozitive për cilësinë dhe sasinë. Prodhimi pritet të jetë rreth 5.000 tonë më i lartë se në të njëjtën periudhë të vitit të kaluar, ndërsa fermerët thonë se presin më shumë prodhim dhe çmime të kënaqshme.

Çmimi aktual i mandarinave në pikat e grumbullimit varion nga 80 deri në 90 lekë për kilogram, krahasuar me 50 deri në 60 lekë vitin e kaluar.

Një pjesë e madhe e prodhimit eksportohet në tregjet europiane, kryesisht në Gjermani, Poloni dhe Ukrainë, ndërsa këtë vit për herë të parë hapet edhe tregu i Zvicrës.