Një tjetër efektiv policie paraqitet te Trauma, me lëndime në duar

Një tjetër efektiv policie është shoqëruar në Spitalin e Traumës gjatë zhvillimit të protestës së sotme.

Mësohet se efektivi ka pësuar lëndime në duar. Kjo vjen si shkak i tensioneve dhe përplasjeve të shumta me protestuesit të cilët kanë hedhur lëndë të ndryshme piroteknike drejt policisë por dhe në institucione dhe godina.

Pak më parë rreth orës 14:37 Ministria e Shëndetësisë njoftoi se po marrin trajtim në urgjencë 3 protestues dhe 2 efektivë policie.

Pritet të shihet në vijim nëse do ketë të tjerë protestues apo efektivë që do paraqiten në spital për ndihmë mjekësore.

Nga ana tjetër, gjatë orëve të pasdites protestuesit janë shpërndarë në qendër të kryeqytetit ku kanë sulmuar me gur dhe zjarr Ministrinë e Financave dhe më pas janë zhvendosur të gjithë në Bulevardin Dëshmorët e Kombit.

Të gjitha vazot e luleve që kanë qenë në anë të rrugës janë hedhur në mes të bulevardit “Dëshmorët e Kombit” duke krijuar një situatë kaotike.

Protestuesit kanë nisur të qëllojnë me gur dhe molotov në drejtim të Kryeministrisë ndërsa forca të shumta policie janë përgjigjur duke hedhur ujë dhe gaz lotsjellës për të shpërndarë turmën.