Nufi viziton kantierin e FINCANTIERI në Itali: Njohje me praktikat më të mira për zbatimin e projektit të përbashkët

Në kuadër të partneritetit me FINCANTIERI, Ministri i Mbrojtjes Ermal Nufi zhvilloi një vizitë në Divizionin e Anijeve Detare të kompanisë në Muggiano, Itali.

Raportohet se kjo është një prej qendrave më të rëndësishme të ndërtimit të anijeve ushtarake dhe sistemeve detare në Evropë.

Gjatë vizitës në kantier, ministri u njoh nga afër me proceset e projektimit, prodhimit dhe integrimit të platformave moderne detare, si dhe me standardet e avancuara të menaxhimit industrial, kontrollit të cilësisë dhe organizimit të një kantieri të integruar të ndërtimit të anijeve.

“Vizita shërbeu si një mundësi shumë e mirë për shkëmbimin e përvojave dhe njohjen me praktikat më të mira të FINCANTIERI, në funksion të zhvillimit të kapaciteteve industriale në Shqipëri dhe zbatimit të projektit të përbashkët “Fincantieri Albania” në Vlorë”, ka shkruar Nufi.