Obama, ftesë Ramës për në Samitin Ndërkombëtar kundër ISIS dhe Ekstremizmit të Dhunshëm

Presidenti Barack Obama ka iniciuar mbajtjen e një samiti me vendet e koalicionit anti-ISIS më 26 Shtator në Nju Jork, nga ku do t’i bëhet një bilanc arritjeve të deritanishme dhe sfidave përballë Shtetit Islamik dhe Ekstremizmit të Dhunshëm.

Top Channel, nga një burim diplomatik, ka mësuar se në zyrën e kryeministrit Edi Rama ka mbërritur ftesa nga Shtëpia e Bardhë për të marrë pjesë në këtë samit.

Po i njëjti burim thotë se kryeministri Edi Rama do të jetë njëri prej 12 lidervë politikë botërorë dhe i vetmi nga vendet e rajonit që do të mbajë një fjalë për të ndarë me pjesëmarrësit, atë që amerikanët e kanë vlerësuar si një sukses të Shqipërisë në përballjen me ekstremizmin.

Gjatë vizitës së fundit në Tiranë, më 13 Korrik 2015, Victoria Nuland, Nënsekretarja  Amerikane e Shtetit për Çështjet Evropiane, dha këtë vlerësim për Shqipërinë në përpjekjet e saj kundër ekstremizimit.

“Ne patëm bisedime të mira me të gjithë spektrin politik dhe organizatat joqeveritare rreth nevojës për t’ju kundërvënë ekstremizmit dhe punës që jeni duke bërë për të adresuar këto probleme në Shqipëri dhe rajon. Ne e konsiderojmë Shqipërinë si një vend që ka ngjitur shumë shkallë, duke u bërë kështu një lider në rajon në këtë luftë dhe ne si partnerë e vlerësojmë këtë. Gjithashtu, dëshiroj të theksoj faktin se, ju keni një traditë të pasur shumëetnike bashkëpunimi gjithashtu edhe në bashkëpunimin ndërfetar. Kjo është diçka shumë e mirë të cilën mund ta ndani me vendet e rajonit. Ne dëshirojmë t’ju përgëzojmë për këtë që keni bërë”, thonte Nuland.
Kjo ftesë vjen edhe si një vlerësim nga Shtëpia e Bardhë pas iniciativës së Ramës për ngritjen në Shqipëri të një qendre rajonale të promovimit të vlerave që luftojnë  ekstremizmin dhe dhunën.

Mësohet se disa ditë më parë, një grup pune nga Uashingtoni që po merret me organizimin e samitit ka qëndruar në Tiranë, duke u takuar me Ramën për të koordinuar axhendën e samitit.

Zyra e shtypit në Kryeministri, kontaktuar nga Top Channel, nuk ka pranuar të bëjë asnjë koment lidhur me këtë cështje.

Ftesa e mbërritur në zyrën e shefit të qeverisë shqiptare shuan të gjitha aludimet mediatike të javëve të fundit se Rama nuk do të ishte pjesë e këtij samiti.