OKB-ja nis vlerësimin e kapaciteteve antiterror të Maqedonisë së Veriut, për herë të parë pas 15 vjetësh

Ministri i Punëve të Brendshme, Pançe Toshkovski, hapi sot në Shkup sesionin fillestar të vizitës vlerësuese të Drejtorisë Ekzekutive të Komitetit kundër Terrorizmit të Këshillit të Sigurimit të OKB-së (CTED), e cila zhvillohet në Shkup nga 2 deri më 6 nëntor, siç njofton Ohrid24. Delegacionin e OKB-së e udhëheq zëvendësdrejtorja e CTED-it, Carmen Cantor.

Qëllimi i vizitës është të vlerësohet zbatimi i rezolutave përkatëse të Këshillit të Sigurimit, të shihen kapacitetet dhe sfidat kombëtare në luftën kundër terrorizmit dhe ekstremizmit të dhunshëm dhe të identifikohen mundësitë për përmirësim të mëtejshëm të reagimit institucional dhe të bashkëpunimit ndërkombëtar. Toshkovski theksoi se vizita është mundësi e rëndësishme për vlerësim gjithëpërfshirës të përparimit të vendit, veçanërisht duke pasur parasysh se vlerësimi i fundit i këtij lloji u krye në vitin 2011.

“Në pesëmbëdhjetë vjetët e fundit Maqedonia kaloi nëpër reforma të rëndësishme institucionale, legjislative dhe strukturore, me të cilat i forcoi kapacitetet e saj të sigurisë dhe e konfirmoi rolin e saj si partner i përgjegjshëm në ruajtjen e stabilitetit rajonal dhe ndërkombëtar”, theksoi Toshkovski.

Ministri njoftoi miratimin e Strategjisë së rishikuar Kombëtare për luftën kundër terrorizmit, me theks të veçantë te radikalizimi dixhital dhe kërcënimet e reja të sigurisë, dhe shtoi: “Tashmë e kemi filluar procesin e formimit të një Njësie Kombëtare të specializuar për ndjekjen dhe luftimin e përmbajtjeve terroriste në internet. Paralelisht, planifikojmë ushtrime simuluese ndërmjetinstitucionale për mbrojtjen e infrastrukturës kritike dhe përballjen me kërcënimet hibride, me përfshirjen edhe të sektorit privat”.

Gjatë vizitës pesëditore do të shqyrtohen disa fusha, mes tyre legjislacioni antiterror, parandalimi i financimit të terrorizmit, siguria kufitare, bashkëpunimi ndërkombëtar policor dhe gjyqësor, parandalimi i radikalizimit, keqpërdorimi i internetit dhe i teknologjive të reja, si dhe mbrojtja e infrastrukturës kritike. Janë paraparë edhe vizita në terren në Aeroportin Ndërkombëtar të Shkupit dhe në pikën kufitare Tabanovcë, ndërsa në sesionet përmbyllëse delegacioni do t’i paraqesë konstatimet dhe rekomandimet paraprake.