Operacion në Portin e Durrësit, bllokohet kokainë, diamante dhe pajisje për metale të çmuara

Strukturat e Doganës Durrës në bashkëpunim me Policinë e Shtetit kanë finalizuar një operacion kontrolli në Portin e Durrësit që ka çuar në bllokimin e një sasie lënde narkotike të dyshuar si kokainë, katër gurë të çmuar të dyshuar si diamante, si dhe një pajisjeje elektronike për detektimin e metaleve të çmuara.

Gjatë kontrolleve të ushtruara në disa automjete të mbërritura me tragetin e linjës Ankona–Durrës, autoritetet konstatuan një valixhe që përmbante aparaturën detektuese dhe aksesorë të ndryshëm të montueshëm.

Në një tjetër rast, gjatë kontrollit fizik të një shtetasi që udhëtonte me një automjet tjetër të ardhur nga Italia, u gjetën katër paketime transparente me gurë të dyshuar si diamante.

Ndërkohë, në një automjet të tretë, shërbimet doganore zbuluan një sasi të dyshuar lënde narkotike kokainë, e fshehur në një veshje në kabinën e drejtuesit të mjetit.

Të gjitha rastet janë referuar pranë organeve kompetente për vijimin e procedurave hetimore dhe ligjore.