Operacioni antidrogë në Itali, Balliu: Dëshmi e dështimit të qeverisë në luftën kundër krimit

Nënkryetari demokrat i Komisionit të Sigurisë, Klevis Balliu, tha se aksioni antidrogë në Itali, ku shumë shqiptarë ishin pjesë e rrjetit të trafikut të kokainës, është pasqyra e dështimit të qeverisë në luftën kundër krimit të organizuar. Balliu akuzoi Kryeministrin se ka bashkëjetuar me grupet kriminale, në vend që t’i luftojë ato.

“Operacioni i fundit antidrogë në Itali, ku dhjetëra të rinj shqiptarë janë përfshirë në rrjete të organizuara të trafikut të kokainës është pasqyra më e qartë e Shqipërisë që ka ndërtuar Edi Rama gjatë këtyre viteve. Sot nuk kemi të bëjmë vetëm me disa grupe kriminale, kemi të bëjmë me pasojat direkte të një qeverisje që për vite me radhë ka bashkëjetuar me krimin e organizuar, e ka toleruar atë dhe në shumë raste ka bashkëpunuar me të për interesa politike, elektorale dhe monetare. Edi Rama premtoi shtet europian, por ndërtoi një realitet ku kartelet shqiptare të drogës janë fuqizuar deri në atë pikë sa po rekrutojnë fëmijët tanë dhe po i kthejnë në trafikan droge në Europë”, deklaroi Balliu.

/RTSH/