Opozita: Qeveria duhet të jep dorëheqje

Partitë opozitare vlerësuan të hënën se kryeministri, Isa Mustafa dhe zëvendëskryeministri, Hashim Thaçi vazhdojnë të qeverisin edhe pse kanë shkelur Kushtetutën e vendit, ndonëse në kushte normale ata do të duhej të jepnin dorëheqje.

Donika Kadaj Bujupi nga Aleanca për Ardhmërinë e Kosovës tha se pas vendimit të Gjykatës, marrëveshjet nuk kanë legjitimitet.

Ajo tha se përkundër vendimit të Gjykatës, Qeveria ende po vazhdon të kontrabandojë të njëjtat marrëveshje.

Kadaj-Bujupi ftoi qytetarët që më 9 janar të dalin në protestë.

Edhe Valdete Bajrami nga Nisma për Kosovën i bëri thirrje qytetarëve që më 9 janar në ora 14:00 të mblidhen para Bibliotekës kombëtare.

Ajo tha se pas vendimit të Gjykatës Kushtetuese, Mustafa dhe Thaçi do të duhej të jepnin dorëheqje.

Ndërkaq, Driton Çaushi nga Vetëvendosje tha se opozita pret që protesta të jetë masive.