Orges Shehi pas suksesit në derbi: E kishim të domosdoshme këtë fitore

“Ishte emocionuese, derbi ka emocione të veçanta”. Trajneri i Tiranës, Orges Shehi ka komentuar për mikrofonët e emisionit “Super Gol” në RTSH fitoren me përmbysje të arritur në derbi, 2-1 përballë Partizanit në javën e 33-të të “Abissnet Superiore”.

“Duke u nisur dhe nga pozicioni, e kishim të domosdoshme këtë fitore. Jam i kënaqur për të gjithë lojtarët, për atë që dhanë në fushë.

“Ndryshuam në pjesën e dytë, na e bëri dhe rezultati. Brenda ndeshjes ka shumë ndeshje, ka shumë ndryshime edhe për shkak të lojtarëve. Derbi ka doza emocionale, të bën të gabosh pasimet e thjeshta”.

“Çfarë u thashë lojtarëve pas pjesës së parë? U thashë lojtarëve se është e sigurt që do fitojmë. Rrini të qetë, besoj te kualiteti juaj. Alvarez? E kam thënë edhe në intervista të tjera, ka shumë kualitet, por ka pasur probleme fizike, menduam ta niste nga stoli. Edhe kundërshtari shpenzon energji dhe donim të përfitonim nga cilësitë e tij”.

“Nuk mbaj mend derbi me kaq shumë raste në tranzicion, njerëzit në stadium mund ta kenë shijuar. Që kur kam mbërritur këtu, u kam thënë lojtarëve që kanë shumë kualitet, ana psikologjike ka qenë një nga armët që kemi punuar më shumë”.

“Mos harrojmë që presioni është i madh, nuk të le të shfaqësh atë që do. Nuk ka pushim për ne deri në fund të kampionatit”.