Papa: Qarkorja për klimën të pritet me shpirt të hapur
Papa Françesku ka bërë thirrje që qarkorja e tij për ambjentin të pritet nga e gjithë bota me “shpirt të hapur”, duke thënë se, deklarata e papreçedentë ekologjike duhet të shihet si një apel për më shumë përgjegjshmëri.
Në esenë që do të publikohet nga Vatikani këtë të enjte, ati i shenjtë pritet të apelojë për një sfidë morale ndaj indiferencës globale për ndryshimet e klimës, duke nënvizuar me terma të ngurtë se, njerëzimi po dështon në rolin e tij të dhënë nga Zoti për t’u kujdesur për Tokën, në një moment kur koha po mbaron.
Ai pritet të thotë gjithashtu se, ndryshimet e klimës shkaktohen kryesisht nga njeriu dhe se pikërisht njerëzit duhet të ndalojnë mbështetjen tek lëndët e vjetra si burim energjie.
“Shtëpia jonë po rrënohet dhe ky rrënim dëmton këdo, sidomos të varfërit. Thirrja ime është një apel për përgjegjshmëri, ndaj i kërkoj kujtdo që ta marrë këtë dokument me shpirt të hapur”, është shprehur Papa.
Qarkorja mund të shihet si testi i fundit i rolit të Papa Françeskut, i konsideruar si një ndër diplomatët më influentë, pasi më herët gjatë vitit ai ndihmoi në përmirësimin e marrëdhënieve mes Shteteve të Bashkuara dhe Kubës.
Publikimi i dokumentit bëhet pak muaj përpara vizitës së atit të shenjtë në Shtetet e Bashkuara, ku ai do t’u adresohet Kombeve të Bashkuara dhe do të përpiqet të inkurajojë negociatorët e çështjes së klimës përpara samitit me të njëjtin subjekt që do të mbahet në nëntor Paris. Gjithashtu, ai do të mbajë edhe një fjalim në Kongresin amerikan në shtator.
