Parisi miraton furnizimin me armë të Irakut kundër xhihadistëve

Franca do të dërgojë në orët në vijim armatime në Irak për të mbështetur kapacitetet operacionale të forcave të angazhuara kundër Shtetit Islamik, xhihadistëve që po përparojnë drejt Bagdadit, njoftoi “Elysée”-ja sot në një komunikatë.

“Që t’i përgjigjemi nevojave urgjente të shprehura nga autoritetet rajonale të Kurdistanit, shefi i shtetit, François Hollande, vendosi, në marrëveshje me Bagdadin, që të dërgojë armatime në orët në vijim”, deklaroi presidenca franceze në një komuniaktë.

Duke u bazuar në bisedën e zhvilluar të enjten mes François Hollande dhe presidentit të Kurdistanit irakian Massoud Barzani, “Elysée”-ja thekson se “Franca tashmë ka marrë dispozitat e nevojshme që prej shumë ditësh për të mbështetur kapacitetin operacional të forcave të angazhuara kundër Shtetit Islamik”.

Vetëm një ditë më parë, Britania e Madhe deklaroi gjithashtu se do të dërgojë materiale ushtarake për forcat kurde për t’i ndihmuar të përballen me ofensivën xhihadiste.