Pas marrëveshjes me çekët, CEZ ndryshon emrin

OSHEE, emri i ri i kompanisë së shpërndarjes së energjisë

Vendimi – Disa ditë më parë CEZ mori vendim që grupin që do të negociojë detajet teknike të marrëveshjes me CEZ-in ta drejtojë kryetari i Entit Rregullator të Energjisë.

Do ta kemi të vështirë të mësohemi me emrin e ri, por nga dita e djeshme CEZ bëhet OSHEE. Kompania e shpërndarjes së energjisë, juridikisht në pronësi të grupit çek CEZ deri në marrjen e vendimit nga Gjykata e Arbitrazhit Ndërkombëtar, që nga 1 janari 2013 ndodhej nën administrim shtetëror. Dje CEZ ka ndryshuar emrin dhe nuk do të quhet më CEZ Shpërndarje, për të ndihmuar në krijimin e një imazhi sa më pozitiv për kompaninë. Ndryshimi i emrit bëhet me aplikim në QKR, por më parë “Enti Rregullator i Energjisë”, ka vendosur në 17 korrik miratimin e ndryshimit të emrit tregtar të shoqërisë “CEZ  SHPËRNDARJE” sh.a., në shoqërinë: “Operatori i Shpërndarjes së Energjisë Elektrike” sh.a., me inicialet “OSHEE” sh.a. Marrëveshja e arritur në fund të qershorit, një natë para marrjes së statusit kandidat për në BE nga Shqipëria, parashikon transferimin e menjëhershme të aksioneve në favor të CEZ Shpërndarje, duke i dhënë shtetit pronësinë e plotë, pas marrjes se 76% të aksioneve që kishte grupi CEZ i Çekisë. Pala çeke hoqi dorë nga kërkimi i vlerës prej 103 milionë eurosh, vlerë me të cilën ajo bleu kompaninë në 2008. Shoqëria e re e shpërndarjes së energjisë tashmë shtetërore, do t’u paguajë çekëve 87.1 milionë euro, me këste deri në 2018, ndërsa interesat e paguara për katër vjet arrijnë në 7.9 milionë euro, duke e çuar koston që duhet të paguajë kompania në rreth 95 milionë euro. Palët heqin dorë nga çdo pretendim i mëtejshëm financiar dhe pala çeke tërhiqet nga procesi i arbitrazhit.