PD: Qeveria nuk po vjedh më “me lezet”
Partia Demokratike, nëpërmjet kreut të departamentit të Turizmit dhe Ambientit, Jamarbër Malltezi, ka denoncuar një akt vjedhjeje, që sipas saj, po ndodh në zyrat e ALUIZNI-t.
“Tanimë nuk po mbajnë as premtimin për të vjedhur me lezet. Njoftojmë Prokurorinë se një akt vjedhjeje shumë i rëndë prej qindra milionësh po ndodh këto ditë në zyrat e ALUIZNI-t. Rama dhe Lame po organizojnë një vjedhje miliona euroshe, duke dhënë para’ për konsulenca për të dhëna që ekzistojnë në serverat e ALUIZNI-t prej shumë vitesh. ALUIZNI i kish kryer matjet në terren për thuajse të gjithë objektet që ishin në proces legalizimi qysh para vitit 2013 dhe këto të dhëna gjenden në serverat e ALUIZNI-t. Kërkohet urgjentisht ndërhyrja e prokurorisë për të shpëtuar paratë publike”, tha Malltezi.
“Qeveria, në turravrapin të vjedhë ç’të mundet, nuk po pyet më as për premtimin e saj solemn për të vjedhur me lezet. Shqiptarët nuk meritojnë këtë qeveri hajdute”, shtoi Malltezi.
