Pentagoni redukton praninë ushtarake në Afrikë, rrit përqendrimin ndaj Kinës dhe Rusisë
“Reduktimi i personelit ushtarak parashikohet të jetë më pak se 10 për qind e 7,200 forcave të përgjithshme ushtarake dhe do të zhvillohet gjatë disa viteve të ardhshme”, tha për Reuters, komandant Candice Tresch, një zëdhënëse e Pentagonit.
Tresch tha se shkurtimet do të prekin aktivitetet kundërt organizatave ekstremiste të dhunshme në vende si Somalia, Xhibuti dhe Libia, ndërsa në pjesë të tjera të rajonit, duke përfshirë Afrikën Perëndimore, theksi do të zhvendoset nga “ndihma taktike, në këshillim, ndihmë, ndërlidhje dhe shkëmbim të inteligjencës”.
Një zyrtar i SHBA, duke folur në kushte anonimiteti, tha se reduktimi i trupave do të kishte gjasa të ndodhte gjatë tre vjetëve të ardhshme dhe mund të përfshinte vende si Kenia, Kameruni dhe Mali.
Roli ushtarak i Shteteve të Bashkuara në kontinentin afrikan ka marrë një vëmendje më të madhe pas një sulmi vitin e kaluar në Niger, kryer nga një shoqatë lokale e Shtetit Islamik, në të cilin u vranë katër ushtarë amerikanë.
Veprimi i Pentagonit vjen kur Kina dhe Rusia kërkojnë të rrisin ndikimin e tyre në Afrikë. Gjatë Luftës së Ftohtë, Bashkimi Sovjetik krijoi lidhje të ngushta ushtarake dhe diplomatike me shumë vende afrikane. Rusia tani po përpiqet të ringjallë disa nga marrëdhëniet që u ndërprenë pas rënies së Bashkimit Sovjetik.
