Përdorimi i mjeteve piroteknike në protestë, lëndohet një person

Protesta e mbrëmjes së sotme në Prishtinë, ku qytetarët kërkojnë votimin e ndryshimeve në Ligjin për Dhomat e Specializuara, është shoqëruar me përdorimin e mjeteve piroteknike, siç njofton Klan Kosova. Sipas raportimit të gazetares së Klan Kosovës, Sala Gashi, nga vendi i ngjarjes, një person u lëndua si pasojë e përdorimit të tyre.

Pamjet nga vendi tregojnë ekipet e urgjencës mjekësore duke e transportuar të lënduarin me barelë drejt ambulancës, ndërsa në sfond duken barrierat policore pranë objektit të Kuvendit.

Protesta, e cila nisi paraditen e së hënës dhe vazhdoi gjatë gjithë ditës, hyri në mbrëmje me tensione të vazhdueshme rreth ndërtesës së Kuvendit. Më herët gjatë ditës, Lutfi Haziri u kishte bërë thirrje protestuesve që të mos i hidhnin mjetet piroteknike në drejtim të Policisë.

Deri në momentin e publikimit të këtij lajmi nuk ka ende një njoftim zyrtar për identitetin dhe gjendjen shëndetësore të personit të lënduar.