Përfundon përleshja mes protestuesve dhe policisë, qetësohet situata në Kaçanik

(E plotësuar) Tashmë është qetësuar situata pas përleshjes mes veteranëve të UÇK-së dhe policisë në Kaçanik.

Nga përleshja me policinë kanë mbetur të lënduar disa protestues. Njëri nga protestuesit ka marrë lëndime më të rëndë dhe po trajtohet nga vetura e emergjencës që ndodhet në vendngjarje.

Policia ka larguar protestuesit nga rruga, por ata vazhdojnë të qëndrojnë të ulur shumë afër, duke vazhduar protestën.

Segmenti i magjistrales është liruar, por vetëm për vetura, maunat nuk po kalojnë ende.

———————————————————————–

Eskalon protesta, lëndohet Xhevdet Qeriqi 

(E plotësuar) Njësia Special e Kosovës po përdor gaz lotsjellës dhe sprej për t’i larguar veteranët e UÇK-së nga rruga magjistrale në Kaçanik, por ata po vazhdojnë të qëndrojnë aty.

Protestuesit po hedhin gurë dhe copa tjegullash në drejtim të njësiteve policore.

Nga përballja me Policinë është lënduar kryetari i Këshillit për Mbrojtjen e Luftëtarëve të UÇK-së, Xhevdet Qeriqi.

————————————————————————————

Eskalon protesta, veteranët përleshen me policinë

Ka eskaluar protesta e veteranëve të Ushtrisë Çlirimtare të Kosovës në Kaçanik, me ç’rast ka ardhur deri te përleshja mes protestuesve dhe policiseë

Gjithçka doli jashtë kontrollit kur protestuesit nuk e përfillën ultimatumin e policisë, për ta liruar rrugën, transmeton Klan Kosova.

—————————————————————————-

Veteranët bllokojnë magjistralen, Policia u jep ultimatum ta zhbllokojnë 

Qindra veteranë të luftës kanë bllokuar magjistralen Kaçanik- Shkup për qarkullimin e kamionëve të cilët bartin mall nga Maqedonia.

Rreth 200 ish pjesëtar të UÇK-ës kanë bllokuar magjistralen që lidh Shkupin me Prishtinën në dalje të Kaçanikut.

Ish luftëtarët kërkojnë të drejtat e tyre që nuk janë realizuar deri më tani. Ata thonë se janë të pakënaqur me çdo vendim që është marr deri më tani.

Protestuesit nuk po lejojnë të kaloj asnjë maune nëpër magjistrale.

Zyrtaret policorë kërkuan lirimin e rrugës dhe dhanë ultimatum 5 minuta, përndryshe do të ndërhyn Njësia Speciale e Policisë së Kosovës.

Udhëheqësi i kësaj proteste, Xhevdet Qeriqi tha se derisa nuk zbatohen kërkesat e tyre, ata nuk do ta lirojnë këtë rrugë për qarkullimin e kamionëve, por vetëm për qytetare dhe makina të vogla.

Veteranët e Ushtrisë Çlirimtare të Kosovës nga Komuna e Kaçanikut janë duke protestuar kundër mospublikimit të një pjese të listave të veteranëve dhe për mosfillimi i zbatimit të ligjit në lidhje me këto lista.