Përzgjedhja për KPP, Komisioni i Ligjeve miraton raportin me kandidaturat, çështja kalon në Kuvend

Komisioni për Çështjet Ligjore dhe Administratën Publike ka përmbyllur fazën e seancave dëgjimore me kandidatët e propozuar nga Këshilli i Ministrave për postin e Kryetarit dhe për tre anëtarët e Komisionit të Prokurimit Publik (KPP). Raporti përfundimtar, i cili konfirmon përmbushjen e kritereve ligjore nga ana e kandidatëve, është miratuar me shumicë votash dhe do t’i përcillet seancës plenare të Kuvendit për votim.

Ndryshimet e fundit në listën e kandidatëve

Mbledhja, e drejtuar nga kryetari i komisionit, Ulsi Manja, nisi me një njoftim procedural mbi ndryshimet e ndodhura në listën fillestare të kandidatëve për shkak të tërheqjeve vullnetare përpara fillimit të dëgjesave.

Sipas procesverbalit të mbledhjes, për pozicionin e Kryetarit, kandidati Martil Sula ka njoftuar se është tërhequr nga gara dhe kandidati Enea Hoti do të garojë vetëm për pozicionin e Kryetarit.

Gjithashtu, nga gara për pozicionin e anëtarit u tërhoqën kandidatët Blerta Lukaj dhe Lindita Hanku, ndërsa kandidati Gjergji Kosta nuk u paraqit në seancën dëgjimore të organizuar nga komisioni.

Seancat dëgjimore dhe prezantimi i platformave

Gjatë seancave, kandidatët e mbetur në garë për pozicionin e Kryetarit Ismail Shehu, Enea Hoti dhe Behar Zeneli, si dhe 17 kandidatët për anëtarë të KPP-së, shpjeguan përpara deputetëve platformat e tyre të drejtimit.

Kandidatët për anëtarë që u paraqitën në dëgjesë ishin: Fiorent Zguro, Edvin Simo, Enkeleon Topulli, Lulzim Mata, Ergys Streza; Donika Daci, Julian Dhima, Najada Merolli, Florian Sahatçiu, Erald Mihali; Bledar Cengu, Nertil Kanina, Xhovan Gjini, Hipokrat Biba, Lorena Beqiri; Endri Dafa dhe Hektor Muçaj.

Gjatë prezantimit, secili kandidat ekspozoi përvojën e tij profesionale dhe vizionin për menaxhimin e Komisionit të Prokurimit Publik, si dhe iu përgjigj pyetjeve të anëtarëve të komisionit parlamentar lidhur me sfidat e institucionit.

Raporti ligjor dhe kalimi në seancë plenare

Në përfundim të procesit të dëgjesave, relatorja e çështjes, deputetja Aulona Bylykbashi, prezantoi raportin përmbledhës mbi procedurat e ndjekura dhe vlerësimin ligjor të kandidaturave.

Sipas relatimit të Bylykbashi, “kandidatët e propozuar nga Këshilli i Ministrave dhe që janë paraqitur në dëgjesa plotësonin kushtet dhe kriteret ligjore për ushtrimin e funksioneve”.

Mbi këtë bazë, komisioni vendosi dërgimin e listës përfundimtare për votim në Kuvend. Siç saktësohet në raport:

“raporti me tre kandidatura për Kryetar të KPP dhe 18 kandidatura për tre vakancat për anëtarë të KPP do t’i përcillet për shqyrtim seancës plenare.”

Pas prezantimit, raporti u hodh në votim dhe u miratua me shumicë votash nga deputetët e pranishëm në Komisionin e Ligjeve. Vendimi përfundimtar për emërimet e reja në KPP i kalon tashmë votimit në seancën e radhës plenare të Kuvendit.