Pezeshkian në takimin e Teheranit: Irani kërkon unitet të vendeve myslimane kundër agresionit izraelit

Presidenti i Iranit, Masoud Pezeshkian, u bëri thirrje vendeve myslimane të forcojnë bashkëpunimin rajonal kundër, siç u shpreh ai, “agresionit izraelit” dhe përpjekjeve të mbështetura nga SHBA-ja për “të përçarë” Lindjen e Mesme, siç njofton Al Jazeera në mbulimin e saj live.

Duke folur në një takim në Teheran me ministrin e Mbrojtjes të Arabisë Saudite, Khalid bin Salman, shefin e ushtrisë së Pakistanit, Asim Munir, dhe kreun e inteligjencës turke, Ibrahim Kalin, Pezeshkian tha se Irani është gati të mbështesë forcimin e unitetit, sigurisë dhe zhvillimit mes vendeve myslimane. Ai dënoi sulmet izraelite në Gaza, Liban, Iran dhe pjesë të tjera të rajonit.

Presidenti iranian shtoi se Irani nuk po kërkon armë bërthamore, por këmbëngul në të drejtën e tij për të ndjekur veprimtari bërthamore paqësore sipas Traktatit për Mospërhapjen Bërthamore (NPT). Ai kritikoi edhe “politikat kontradiktore të SHBA-së”, duke përfshirë, sipas tij, angazhimin në negociata ndërkohë që sulmohen Irani dhe objektet e tij bërthamore.

Bisedimet në Teheran synojnë të parandalojnë përshkallëzimin e mëtejshëm në rajon, sipas ministrisë së Jashtme saudite, e cila theksoi rëndësinë e hapjes së kanaleve të negociatave. Zyrtarët e tre vendeve — anëtare të Paktit të Mbrojtjes së Mekës — u takuan edhe me sekretarin e Këshillit Suprem të Sigurisë Kombëtare të Iranit, Mohsen Rezaei; këto janë bisedimet e para mes të tre anëtarëve të aleancës dhe Iranit që kur Huthi-t e Jemenit i përshkallëzuan sulmet ndaj Arabisë Saudite muajin e kaluar.