Plantacion me kanabis në Velipojë, pezullohet nga detyra shefi i Komisariatit Shkodër

Një plantacion me 7446 bimë të dyshuara narkotike Cannabis Sativa është zbuluar në fshatin Reç i Ri të Velipojës sot në 9 qershor.

Pas marrjes së informacionit, Policia e Shtetit organizoi menjëherë operacionin për asgjësimin e bimëve dhe identifikimin e autorëve. Zbulimi i plantacionit ka sjellë masa të menjëhershme ndaj drejtuesve lokalë të policisë.

Drejtori i Përgjithshëm i Policisë së Shtetit Skënder Hita ka pezulluar nga detyra shefin e Komisariatit të Policisë Shkodër, shefin e Stacionit të Policisë Velipojë dhe një ndihmësspecialist.

Ndaj tyre ka nisur hetim disiplinor për mangësi në përmbushjen e detyrave. Gjithashtu, hetim disiplinor ka nisur edhe për dy punonjës të tjerë. Autoritetet po vijojnë veprimet për zbardhjen e plotë të rastit dhe kapjen e personave përgjegjës për kultivimin e bimëve narkotike. Policia e Shtetit thekson se lufta kundër kultivimit të lëndëve narkotike mbetet një nga prioritetet kryesore të saj.

Njoftimi i Policisë:

Policia e Shtetit

U gjetën të kultivuara 7446 bimë të dyshuara narkotike Cannabis Sativa, në fshatin Reç i Ri, Njësia Administrative Velipojë, Drejtori i Përgjithshëm i Policisë së Shtetit, Drejtues Madhor Skender Hita, pezullon nga detyra Shefin e Komisariatit të Policisë Shkodër, Shefin e Stacionit të Policisë Velipojë dhe Ndihmësspecialistin e Policimit në Zonë, përgjegjës për territorin ku u gjetën bimët.

Nis hetimi disiplinor dhe për 2 punonjës të tjerë, pjesë e grupit të kontrollit të territorit.

Pas informacionit të ardhur në postën elektronike të Drejtorit të Përgjithshëm të Policisë së Shtetit, për kultivimin e mijëra bimëve narkotike, në fshatin Reç i Ri, Velipojë, në një territor të hapur, lehtësisht të verifikueshëm në zonë fushore, u organizua menjëherë puna për asgjësimin e tyre, si dhe për identifikimin dhe kapjen e autorëve.

Ndërkohë, Drejtori i Përgjithshëm i Policisë së Shtetit urdhëroi Drejtorinë e Standardeve Profesionale për të kryer një hetim të thelluar administrativ.

Për mangësi të konstatuara në mospërmbushjen e detyrave, filloi hetimi disiplinor për 5 punonjës policie, konkretisht për:

-Kryekomisar B. L., me detyrë Shef i Komisariatit të Policisë Shkodër, për të cilin është vendosur pezullimi disiplinor nga detyra;

-Nënkomisar Z. M., me detyrë Shef i Stacionit të Policisë Velipojë, gjithashtu i pezulluar nga detyra;

-Inspektor S. K., me detyrë Ndihmësspecialist i Policimit në Zonë, përgjegjës për territorin ku u gjetën bimët narkotike, i pezulluar nga detyra.

Më tej, ka nisur hetimi disiplinor, pa pezullim nga detyra, për Nënkomisar D. N., me detyrë Specialist për Hetimin e Krimeve në Stacionin e Policisë Velipojë dhe Inspektor E. I., me detyrë Ndihmësspecialist i Policimit në Zonë në Stacionin e Policisë Velipojë, të dy pjesë e grupit të kontrollit të territorit.

Lufta kundër kultivimit të bimëve narkotike dhe çdo forme të paligjshmërisë është prioritet i Policisë së Shtetit.

Çdo rast do të trajtohet me vendosmëri maksimale dhe pa asnjë kompromis, si ndaj autorëve të veprave penale, ashtu dhe ndaj çdo punonjësi policie që nuk përmbush detyrimet ligjore apo abuzon me detyrën.

/tvklan.al