Plenkoviq: Mali i Zi zgjidhi dy çështje me Kroacinë, por ka ende të tjera për të zgjidhur

Kryeministri i Kroacisë, Andrej Plenkoviq, këmbënguli të martën në zgjidhjen e të gjitha çështjeve të hapura me Malin e Zi, në mënyrë që vendi të marrë dritën jeshile të Zagrebit për anëtarësimin në Bashkimin Evropian, pasi Podgorica përmbushi dy nga kërkesat e Kroacisë, siç njofton agjencia Hina.

Qeveria malazeze njoftoi më herët të martën se ka vendosur ta ndryshojë emrin e pishinës së qytetit në Kotorr, që mbante emrin e vaterpolistit Zoran Gopçeviq, i akuzuar si rojtar i kampit të Morinjit, dhe se pishina do të mbajë tani emrin e Petar II Petroviq Njegoshit. Po ashtu, qeveria miratoi në mënyrë retroaktive pllakën përkujtimore për të burgosurit kroatë të kampit të Morinjit, e vendosur më 10 tetor 2022 në murin prej guri pranë hyrjes së ish-kampit.

«Këto janë dy çështje, por ka edhe të tjera», deklaroi Plenkoviqi për gazetarët, duke komentuar vendimet e Podgoricës, sipas raportimit të Hinës. «Presim bisedime me Malin e Zi dhe ngritjen e vetëdijes se duhet të zgjidhen këto çështje, që janë çështje vlerash dhe çështje të marrëdhënieve të fqinjësisë së mirë», shtoi ai.

Përveç pllakës së Morinjit dhe pishinës së Kotorrit, sipas Hinës, çështjet e tjera të hapura kanë të bëjnë me zbardhjen e fatit të personave të zhdukur, dëmshpërblimin e të burgosurve të kampit të Morinjit, ndjekjen penale të përgjegjësve për krime lufte, zgjidhjen e çështjeve pronësore-juridike të familjeve kroate, çështjen e kufirit dhe kthimin e anijes shkollore «Jadran».

Kroacia i kërkoi së fundmi Malit të Zi zgjidhjen e tetë çështjeve të hapura, shumica trashëgimi e luftës së viteve ’90, përpara anëtarësimit të vendit në BE, dhe listën e kërkesave ua shpërndau vendeve anëtare të Unionit. Autoritetet malazeze kanë planin ambicioz që Podgorica t’i mbyllë të gjithë kapitujt negociues deri në fund të këtij viti dhe të bëhet anëtare e BE-së në vitin 2028, siç njofton Hina.