“Plotësoni kërkesat e protestuesve”, Berisha: Parlamenti të krijojë një qeveri kujdestare për zgjedhje të lira e të ndershme

Në fjalën e tij në Kuvend, kreu i Partisë Demokratike, Sali Berisha, dënoi përdorimin e dhunës nga Policia ndaj protestuesve. Ai hodhi akuza të forta ndaj kryeministrit Edi Rama, duke e cilësuar “përgjegjës për largimin e shqiptarëve nga vendi, krijimin e “shtetit të drogës” dhe pasurimin e familjes së tij.

Kryedemokrati kërkoi shpërndarjen e Parlamentit dhe krijimin e një qeverie kujdestare, me qëllim zhvillimin e zgjedhjeve të lira dhe të ndershme. Sipas Berishës, mazhoranca nuk ka më legjitimitet për të qeverisur, ndërsa u bëri thirrje autoriteteve të plotësojnë kërkesat e protestuesve.

“Dënoj me forcën më të madhe dhunën ndaj djemve dhe grave idealiste, të cilët nuk ju njohin ju si parlament dhe kërkojnë shpërndarjen e tij, ndërsa ju u rezervoni armë kimike dhe lëndë djegëse. I shpallni terroristë këtu, me kryetarin tuaj.

Shqipëria përfaqësohet nga ata që kërkojnë largimin e Edi Ramës, njeriut që ndërtoi në Shqipëri shtetin e drogës, që përzuri nga Shqipëria, në 10 vitet e politikave të tij, mbi 47 për qind të shqiptarëve. Njeriu që krijoi pasuri përrallore vetëm për familjen e tij. Njeriu i akuzuar brenda dhe jashtë Shqipërisë se ka transportuar në 140 udhëtimet e tij tonelata droge, me valixhe diplomatike, më shumë se qeveritë evropiane të marra së bashku. Jeni bërë simbol i vjedhjeve ndaj shqiptarëve.

Sot, parlamenti duhet të vendosë fundin e tij, krijimin e një qeverie kujdestare për zgjedhje të lira e të ndershme. Nuk keni më të drejtë të qeverisni. Hiqni dorë nga dhuna ndaj protestuesve dhe plotësoni kërkesat e tyre.”