Polici u qëllua gabimisht, zbardhet dinamika e plagosjes në Shkozë, shpallen në kërkim dy vëllezër

Policia ka zbardhur dinamikën e ngjarjes së ndodhur në mesnatë në zonën e Shkozës, ku mbeti i plagosur aksidentalisht një efektiv policie jashtë shërbimit. Për atentatin janë shpallur në kërkim dy vëllezër, të identifikuar si Aldo Lika, 33 vjeç dhe Ali Lika, 22 vjeç.

Sipas hetimeve paraprake, dyshohet se autorët kanë qëlluar me armë zjarri nga automjeti i tyre në drejtim të 31-vjeçarit Kejdi Spaja, i cili ndodhej pranë banesës së tij së bashku me shtetasit Anxhelo Kumaraku dhe L. D.

Nga të shtënat është plagosur aksidentalisht në këmbë Anxhelo Kumaraku, 30 vjeç, punonjës policie jashtë shërbimit, i cili ndodhet jashtë rrezikut për jetën dhe po merr mjekim në spital.

Në vijim të veprimeve hetimore, policia arrestoi edhe Kejdi Spajën, pasi rezultoi se kishte thyer masën e sigurisë “Arrest në shtëpi”, të caktuar më herët nga gjykata për veprën penale “Armëmbajtja pa leje”.

Ndërkohë, Drejtori i Përgjithshëm i Policisë së Shtetit ka pezulluar menjëherë nga detyra efektivin Anxhelo Kumaraku. Ndaj tij, Drejtoria e Standardeve Profesionale ka nisur hetim disiplinor për shkelje të rëndë disiplinore, pasi dyshohet se është shoqëruar me një person që kishte thyer masën e sigurisë dhe nuk ka njoftuar strukturat policore për rastin.

Policia, në bashkëpunim me Prokurorinë e Tiranës dhe Agjencinë e Mbikëqyrjes Policore, vijon hetimet për dokumentimin e plotë të ngjarjes dhe kapjen e dy autorëve të shpallur në kërkim.