Kosova
Policia e Kosovës nis reduktimin e forcave të saj në veri
Ka nisur reduktimi i forcave të Policisë së Kosovës sipas marrëveshjes së arritur nga zëvendëskryeministri Besnik Bislimi dhe emisari i BE-së për dialogun Kosovë-Serbi, Miroslav Lajçak.
Lajmi është konfirmuar për RTK-në nga zëdhënësi i policisë për rajonin e Mitrovicës, Veton Elshani.
“Pas pranimit të vendimit të Qeverisë nga ana e Menaxhmentit të Policisë, i njëjti është dërguar në terren për ekzekutim. Vendimi i Qeverisë ka filluar të implementohet”, tha Elshani.
Në fakt, në marrëveshjen e arritur të hënën në Bratisllavë, por e cila u bë publike të martën nga Qeveria e Kosovës, parashihet që në kuadër të hapave të shtensionimit të situatës në veri, Kosova të reduktojë për 25 për qind prezencën e Policisë së Kosovës në dhe rreth objekteve komunale.
