Policia në Brčko nis procedim kundër studentëve nga Serbia për tubim të palajmëruar

Policia e Distriktit të Brčkos në Bosnjë-Hercegovinë ka nisur procedim kundër studentëve nga Serbia, të cilët organizuan një tubim pa e lajmëruar paraprakisht institucionet, në kundërshtim me Ligjin për tubimet paqësore të Bosnjë-Hercegovinës, i cili është në fuqi që nga viti 2020.

Sipas njoftimit të policisë, tubimi paqësor i studentëve nuk u ndërpre, por organizatorëve u janë shkruar denoncime kundërvajtëse, pasi nuk kishin respektuar ligjin dhe nuk kishin njoftuar institucionet kompetente për organizimin e tubimit dhe vendosjen e stendave. Për shkak se kundërvajtësit janë shtetas të huaj, ndaj tyre është nisur procedurë e shkurtuar kundërvajtëse para Gjykatës Themelore të Distriktit të Brčkos.

Bëhet fjalë për aktivistët e listës “Studentët fitojnë”, të cilët po vizitojnë qytete të Republikës Sërpska në kuadër të fushatës zgjedhore për zgjedhjet parlamentare të parakohshme të 25 tetorit, me qëllim mobilizimin e votuesve me shtetësi të dyfishtë. Përveç Brčkos, aktivistët kanë qenë në Bijeljinë dhe Trebinjë, ndërsa në rrjetet sociale kanë paralajmëruar se do të vizitojnë edhe qytete të tjera, përfshirë Banjallukën.

Gjatë së njëjtës vizitë, në Višegrad ndodhi edhe një incident: një burrë i sulmoi verbalisht studentët dhe u mori transparentin që mbanin, siç shihet në pamjet e transmetuara nga televizioni N1. Nga lista studentore, rasti në Brčko u cilësua si një “pakëndshmëri” që nuk do t’i ndalojë ata në punën e tyre.

Burimi: Danas / BBC në serbisht