Senati amerikan hedh poshtë me 50-49 votë rezolutën për kufizimin e kompetencave të Trump-it në luftën me Iranin

Senati i Shteteve të Bashkuara hodhi poshtë të enjten rezolutën e udhëhequr nga demokratët që synonte t’i jepte fund luftës me Iranin deri sa luftimet të autorizohen nga Kongresi. Rezoluta dështoi me 50 vota kundër dhe 49 pro, kryesisht sipas vijave partiake, duke i lënë presidentit Donald Trump duart e lira për të vazhduar operacionet ndaj Iranit.

Katër senatorë republikanë — Susan Collins e Majnes, Lisa Murkowski e Alaskës, Rand Paul i Kentakit dhe Thom Tillis i Karolinës së Veriut — votuan me demokratët në favor të rezolutës. Ndërkohë demokrati i Pensilvanisë, John Fetterman, votoi kundër me shumicën e republikanëve. Dy senatorë nuk morën pjesë në votim.

Votimi u zhvillua vetëm disa javë para zgjedhjeve të mesmandatit të 3 nëntorit, dhe lufta është bërë një nga çështjet më të nxehta të fushatës. Çmimet e larta të benzinës dhe naftës kanë tronditur votuesit, dhe një numër në rritje republikanësh në gara të ngushta po i bëjnë thirrje Trump-it t’i japë fund sa më shpejt luftës.

Demokratët e përqendruan debatin te kostoja e konfliktit: Zyra Buxhetore e Kongresit vlerësoi se lufta me Iranin i ka kushtuar SHBA-së rreth 38 miliardë dollarë dhe po rritet me deri në 3 miliardë dollarë në muaj. Ndërsa republikanët e mbrojtën votën si mundësi për t’u distancuar nga menaxhimi i luftës nga Trump-i pa e penguar atë, duke e cilësuar rezolutën si “votim politik”.

Ishte përpjekja e 14-të në Senat për të kufizuar kompetencat e luftës së Trump-it që nga fillimi i konfliktit në shkurt. Rezoluta kishte kaluar Dhomën e Përfaqësuesve në korrik, por edhe nëse do të kalonte Senatin, si rezolutë e përbashkët ajo nuk do të kishte fuqi ligjore detyruese për presidentin.

Burimi: Reuters